Rusiyeniñ Cenübiy okrugınıñ arbiy mahkemesi Aqyar sakinini balkonından qıçırğan «Rusiyege qarşı şiarları» içün bir buçuq yıl yaşav tarzı koloniyasında qalmasına üküm etti. Bu aqta Rusiye kütleviy haber vastaları Rusiye FSBsiniñ matbuat hızmeti bergen malümatqa esaslanıp bildire.
«58 yaşında Aqyar sakini Hrustalev soqağındaki evniñ daire balkonından Rusiyege ve ükümetke qarşı şiarlar qıçırdı, hususan Rusiye Federatsiyasında anayasa qurumını devirmege çağırdı», – dep bildire FSB haberini «Krıminform» neşiri.
Rusiye Federatsiyası Ceza kodeksiniñ 205.2 maddesine istinaden (terror faaliyetine çağıruv, terrorizm ya da terrorizm propagandasınıñ aqlavı) mahküm etilgenniñ adı aydınlatılmay. Onıñ izaatları da yoq.
Rusiyede ve onıñ tarafından işğal etilgen topraqlarda quvetçiler Ukrayına tarafdarlarını taqip ete. Rusiye tarafdarı qırımlı bloger Aleksandr Talipov öz telegram kanalında Ukrayınağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar tutula ve Rusiye ordusınıñ «areketini yaramaylaştırğanı» içün memuriy ve cinaiy mesüliyetke çekile.
Rusiye Federatsiyası büyük istilâğa başlağan soñ Rusiye ordusınıñ «diskreditatsiyası» aqqında Memuriy cinayetler kodeksiniñ 20.3.3 maddesi kirsetildi. Rusiye-Ukrayına cenki aqqında malümat tarqatqanlar ve Kremlniñ noqta-i nazarına zıt kelgen er angi fikir bildirgenler taqip etile. Rusiye öz qanunlarını yarımada territoriyasına kenişlete, şunıñ içün qırımlılar da bu madde boyunca mesüliyetke çekilmek telükesi altında buluna.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
