Rusiye polisi 21 yaşında Aqyar sakinine qarşı vandallıq aqqında cinaiy dava açtı. O, Qara deñiz flotunıñ sabıq komandanı Fedot Klokaçevniñ eykeli yanında bayraqnı aqaretlegen eken. Bu aqta müessiseniñ Telegram kanalında aytıla.
«Şübhelige qarşı Rusiye Federatsiyasınıñ Ceza kodeksiniñ 214-ünci maddesiniñ 2-nci qısmı «Vandallıq» qabaatına istinaden cinaiy dava açıldı. Maddeniñ cezaları üç yıl qadar apis cezası berilmesini belgilemekte», – dep aytıla haberde.
Erkek avgust ayında «Rusiye Federatsiyasınıñ Devlet bayrağını aqaretlev» maddesine istinaden tutuldı, dep aytıla. Aqyarlığa qarşı Rusiye ordusını itibardan tüşürgen açıq laflar sebebinden memuriy protokol da tizilgen eken.
Uquq qoruyıcılar bildirgenine köre, mabüs Kaça qasabasında infrastruktura obyektlerine Ukrayına timsallerini yapqan eken.
Şübheliniñ soyadı ya da izaatları aydınlatılmay.
«Qırım esnası» aq qorçalayıcı teşkilâtı Ukrayınada büyük cenk başlağanından berli işğal etilgen Qırımnıñ 472 sakini Rusiye ordusını «itibardan tüşürüv» maddesine istinaden qabaatlandı, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
