Aqyarda elektrik energiyasını berüv vaziyeti daa beter oldı, Rusiye akimiyeti altı saattan soñ ışıqlarnı eki saatqa berüv rejimi olmaycaq, şimdilik tam bir cedvel yoq, dep bildirdi. Bu aqta Aqyarnıñ Rusiye yolbaşçısı Mihail Razvojayev içtimaiy ağlardaki saifelerinde haber etti.
"Emirler vaziyetke köre sistem dispetçerinden kele, şunıñ içün şimdi tam bir cedvel yoq. "6 arasında 2" rejiminden bile vazgeçmege mecbur oldıq, çünki sistemada küç az. Şimdi ışıq ilk evelâ hastahane, nasos stantsiyaları ve diger müim obyektlerge berile", – dep yazdı Razvojayev.
Onıñ aytqanına köre, "6-dan soñ 2" cedveli aqşamğa berile bile, amma şimdi şeerniñ Rusiye akimiyeti bunı kefil etip olamay.
"Vaqıt deñişe bile, hat yüküne köre ve dispetçerlerden kelegen emirlerge köre", – dep yazdı Razvojayev.
İyün ve iyül aylarında Qırımdaki arbiy ve energetika obyektleri, Rusiye logistik yolları Ukrayina Silâlı quvetleriniñ eñ büyük ücümlerine oğray. Er kün yañı nişanlarğa darbeler aqqında haber etile, Qırımda yaqarlıq qıtlığı sebebinden adiy insanlarğa benzin satılmay, elektrik energiyası cedvelge köre berile, Keriç köpründe ise nevbetler bar. Bala şifahane müessiseleri ve lagerleri sentâbr ayına qadar raatlanğanlarnı qabul etmey.
İyulniñ başından Ukrayina Uçucısız sistemalar quvetleri er kün Azaq ve Qara deñizlerinde Qırımğa yaqarlıq da taşığan Rusiye "kölge flotunıñ" tankerleri ve diger gemilerine darbe endirgenine dair esabat bere.
Ukrayina Mudafaa naziri Mıhaylo Fedorov darbelerniñ maqsadını añlattı – "Qırım dronlarnen izolâtsiya etile". Onıñ aytqanına köre, bu "rusiyeliler içün pek beklenilmegen aqibetlerge yol aça bile".
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.