Aqyarda ava mudafaa sistemasınıñ işine oşağan küçlü sesler eşitile, dep haber ete Rusiye ve yerli Telegram kanalları. Rusiye kontrolindeki şeer yolbaşçısı Mihail Razvojayev Rusiye ava mudafaası Lübimovka rayonında deñiz üzerinde raketanı urıp tüşürdi, dep bildire.
«Aqyarda ava mudafaa sisteması çalışa. İlk malümatqa köre, Lübimovka rayonında deñiz üzerinde raketa tüşürildi. Bütün hızmetler kontrol ete», – dep yazdı Razvojayev Telegram kanalında. Bu malümatnı mustaqil menbalarda tasdıqlamaq imkânsız ola.
Bundan ğayrı, o, Rusiye arbiyleri Aqyar körfezinde gizlegen tuman qullandı, dep bildirdi.
«Aqyar körfezi rayonında tuman körseñiz – arbiyler gizlenüv vastalarını qullana. Hatırlatam, qoqusı yaramay, amma telükesiz», – dep yazdı Razvojayev.
Aqyarda oktâbrniñ 20-nde saat 17:23-te ava telükesi signalı oldı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
