Keçken gece işğal etilgen Qırımda ve Aqyarda dronlar uçtı, mobil ateş gruppalarınıñ atışları ve patlavlar eşitildi, yanğınlar çıqtı, bu aqta Rusiye akimiyeti ve Qırım haber saifeleri bildire.
Aqmescit, Aqyar, Yalta ve Aluşta civarında dronlaru uçtı ve mobil ateş gruppaları atış etti.
"Krımskiy veter" Telegram kanalı yarı geceden soñ abunecileriniñ malümatına esaslanıp, "Aqyarda mobil gaz turbina elektrik stantsiyası civarında patlavlar eşitildi", dep yazdı.
"Krımskiy veter" gece Yaltada dört ve Gurzufta eki patlav oldı, dep bildirdi: "Elektrik aststantsiyası olğan Darsan töpesinde yanğınlar çıqtı".
Aqyarnıñ Rusiye yolbaşçısı Mihail Razvojayev Telegram kanalında şeerde eki kere ava telükesini ilân etip, Rusiye "arbiyleri, ava mudafaası ve mobil ateş gruppaları bu gece Ukrayina Silâlı quvetleriniñ eki ücümini keri qaytardı ve 13 duşman uçucısızını zararsız alğa ketirdi", dep bildirdi.
Rusiye Mudafaa nazirligi saba 21 Rusiye regionı, işğal etilgen Qırım ve Qara deñizde 453 ukrayin uçucısızını tuttı ve yoq etti, dep esabat berdi.
Ukrayina arbiyleri Qırımdaki adiselerni izaatlamadı.
Qırım.Aqiqat bu malümatnı cenk vaziyetinde mustaqil şekilde teşkerip olamay.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.