İşğal etilgen Qırımnıñ farqlı rayonlarında martnıñ 6-na keçer gecesi küçlü patlavlar oldı, dep haber ete Qırımnıñ Telegram kanalları. Aqyarnıñ Rusiye akimiyeti uçucısızlarnıñ şeerge qarşı ücümi neticesinde 9 kişi yaralandı, dep bildire.
Martnıñ 5-nde aqşam Rusiye akimiyeti Aqyarda ava telükesini ilân etti, yerli telegram kanalları "şeerde ışıqlar ve suv yoq", cemaat naqliyatınıñ areketi toqtatıldı, dep bildirdi.
Bundan ğayrı, yerli saifeler Aqyarnıñ farqlı taraflarında uçucısız ücüminden soñ patlavlar aqqında yazdı.
"Krımskiy veter" Telegram kanalı abunecileriniñ malümatına esaslanıp, yarı geceden soñ Kezlevde bir qaç patlav ve "Pantsr" Rusiye zenit-raketa kompleksiniñ işi aqqında ve saat 1:30-da Aqmescit rayonınıñ Donskoye köyünde küçlü bir patlav aqqında yazdı.
"Krımskiy veter" monitoring gruppası uydu çekimleriniñ malümatına esaslanıp yazğanına köre, "gece uçucısız ücümi vaqtında Qırımda büyük elektrik ast stantsiyası zarar kördi – anda yanğın qayd etildi".
Onıñ malümatına köre, Curçı rayonınıñ Qıyat (Ostrovskoye) köyü yanındaki "Ostrovskaya" PS 330 kV elektrik ast stantsiyası yandı, o, Qırım yarımadasınıñ elektrik tarqatuv merkezlerinden biri ola. Bu ast stantsiya yanvarniñ 15-nde aqşam da ücümge oğrağan edi, o vaqıt dört rayonda elektriki energiyası ketken edi: Canköy, Curçı, Qurman ve Aqşeyh.
"Bundan ğayrı, yarımadada Qurman rayonınıñ Tsarekviçi (Puşkino) yaqınlarında, "Veseloye" uçaq alanı yanında yanğın qayd etildi. Çalışmağan uçaq alanını rusiyeliler cenk başlağan soñ faal qullanıp başladı", – dep haber ete "Krımskiy veter".
Aqyarnıñ Rusiye yolbaşçısı Mihail Razvojayev Telegram kanalında dron ücüminiñ neticeleri aqqında yazdı: "Yefremov soqağında beş qatlı çoq daireli ev pek zarar kördi… Umumen yaralanğan 9 kişi tibbiy yardım istedi: 6 insan (üçü bala) çeşit yaralarnen hastahagege alındı, üçü ciddiy olmağan yaralar alıp, hastahanege yatmaqtan vazgeçti".
Aqyarda saat 5:02-de ava telükesi lâğu etildi.
Saba Rusiye Mudafaa nazirligi Rusiye ava mudafaası keçken gece Qırımda 56 ukrayin uçucısızını, Azaq deñizinde 7 uçucısıznı ve Qara deñizde 5 uçucısıznı yoq etti, dep bildirdi. Bunıñ bir delili kösterilmedi. Müessise tüşürilgen dronlarnıñ sayısını da aydınlatmadı.