Qırımda ve Aqyarda sentâbrniñ 24-nde gece patlavlar ve Rusiye Federatsiyası Ava mudafaasınıñ işi eşitildi, Rusiye Fevqulâde vaziyetler nazirligi dron ve raketa telükesi aqqında tenbilegen edi.
Sentâbrniñ 23-nde saat 20:52-den 21:34-ke qadar Rusiye Fevqulâde vaziyetler nazirligi Qırımda raketa telükesini ilân etti. Sentâbrniñ 24-nde saat 00:03-den bir saatqa ve saat 01:28-den 30 daqqağa uçucısız telükesi ilân etildi.
Rusiye kontrolindeki Aqyar yolbaşçısı Mihail Razvojayev sentâbrniñ 23-ü aqşamdan sentâbrniñ 24-ü gecege qadar üç kere ava telükesi aqqında bildirdi. Bundan ğayrı, Lenin ve Gagarin rayonlarında, Şimaliy ve Cenübiy mol rayonında ve Balıqlavada Rusiye ava mudafaasınıñ işi aqqında bildirdi.
Bunıñnen beraber, "Krımskiy veter" Telegram kanalı yerli sakinlerniñ malümatına esaslanıp, "Belbek", "Gvardeyskoye" ve "Kaça" Rusiye arbiy uçaq rayonları civarlarında eşitilgen patlavlar aqqında yazdı. Aqmescitte GRES qasabasında ışıq yoq edi.
Rusiye Mudafaa nazirligi Rusiye regionları ve işğal etilgen Qırımda yoq etilgen 40 uçucısız aqqında bildirdi. Tüşürilemegen dronlarnıñ sayısını müessise aydınlatmay.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.