Martnıñ 23-nde gece ve martnıñ 24-nde saba Aqyarda Rusiye akimiyeti ava telükesini ilân etti. Bu aqta yerli telegram kanalları haber etti.
"Aqyarda arbiyler Ukrayina Silâlı quvetleriniñ ücümini keri qaytara, ava mudafaası çalışa. Endi 3 nişan uruldı", – dep yazdı Rusiye kontrolindeki Aqyar yolbaşçısı Mihail Razvojayev.
Akimiyetke qoltutqan "ÇP Krım" telegram kanalı "Aqyar ve Balıqlava issi elektrik stantsiyaları, İnkerman, Belbek ve Kaça içün telüke" aqqında bildirdi.
Aynı vaqıtta, Ukrayina tarafdarı "Krımskiy veter" telegram kanalı Felenk burnu rayonında patlav aqqında bildirdi. Onıñ malümatına köre, anda bir qaç Rusiye arbiy bölügi bar.
"Rusiye ava mudafaasınıñ işi olmadı", – dep yazdı "Krımskiy veter".
Onıñ haberine köre, yerli vaqıtnen saat 07:15-te yarım saat devamında Yañı Şüli (Şturmovoye) ve Saharnaya Golovka patlavlar oldı: "Anda yaqınlarda silâ anbarları bar. Zenit raketalarınıñ çıqışları ve uçuvları oldı", – dep haber etti "Krımskiy veter".
Akimiyetke qoltutqan "ÇP-Sevastopol" Telegram kanalı Aqyarda patlavlar ve çoq qatlı evde yanğın aqqında bildirip, uçucısız ücümleriniñ foto ve videolarını derc etti. Diger yerli saifeler de şeerde mesken evde çıqqan yanğın aqqında bildirdi.
Rusiye Mudafaa nazirligi ücümni tasdıqlap, "keçken gece devamında ava mudafaasınıñ nevbetçi vastaları uçaq çeşitli 55 ukrayin uçucısızını tutıp urdı", şu cümleden Qırımda ve Qara deñizde, dep bildirdi.
Rusiye akimiyetiniñ haberine köre, yerli vaqıtnen saat 08.20-de ava telükesi lâğu etildi.
Ukrayina arbiyleri Aqyar ücümini şimdilik izaatlamadı.
Qırım.Aqiqat cenk şaraitlerinde bu malümatnı mustaqil şekilde teşkerip olamay.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete, bu malümatnı teşkermege imkân olsa da, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etkenini tasdıqlamay.