Rusiyeliler Keriç köprü Ukrayına Silâlı quvetleriniñ tam yüksek ve uzun mesafeli silâsı qarşısında zayıf olğanını añlap, işğal altındaki Qırım ve Rusiye arasındaki parom keçitini tertipke qoya, dep bildirdi Qırımtatar Milliy Meclisiniñ reisi Refat Çubarov.
O, Rusiye Federatsiyasınıñ ükümet saytından ekran resmini derc etti. Oña köre, Keriç ve Kavkaz limanları arasında parom keçitiniñ abadanlaştırıluvı içün para ayırmağa teklif etile. Çubarovnıñ fikirince, işbu qarar Qırımğa yerleşken aman-aman bir million Rusiye vatandaşı içün daa bir ciddiy signal ola.
«Böylece, başqasınıñ toprağında yerleşe bilecegini tüşüngen Rusiye vataşdaşları: paromlarğa işanmañız – altı dane olacaq, olar işğalci ordunıñ bütün arbiylerini bile tahliye etip olamaz. Qırımnı öz isteginen ne qadar erte terk etseñiz, Ukrayına Silâlı quvetleri Qırımnı azat etip başlağanda daa az oğursızlıq körersiñiz», – dep yazdı Çubarov Facebook saifesinde.
Aprelniñ 29-na keçer gecesi Aqyarnıñ Kazaçya körfezinde cermay bazası yandı, dep bildirdi Qırım.Aqiqat mühbiri. Onıñ aytqanına köre, yanğın pek küçlü edi, tuman tek saba dağıldı. Gece saat ekilerde atış sesleri eşitildi.
Şeerniñ Rusiye yolbaşçısı Mihail Razvojayev yanğınnıñ sebebi uçucısızlarnıñ ücümi oldı, dep bildire. Onıñ aytqanına köre, yerli sakinler içün bir telüke yoq, yanğında kimse yaralanmadı. Kimse tahliye etilmeycek, amma adise civarlarında zeerli madde ölçüsi yapılacaq.
Bundan evel, aprelniñ 24-ne keçer gecesi, Qırım.Aqiqat mühbirleri Aqyardaki patlavlar aqqında bildirdi. Olarnıñ aytqanına köre, patlavlar Nahimov oquv yurtu ve Streletskaya körfezi yaqınlarındaki arbiy bölükler rayonında eşitildi. Zenit topu ve atıcı silâ ateşleri de eşitildi.
Malümatnı şeerniñ Rusiye yolbaşçısı Mihail Razvojayev tasdıqladı. Onıñ aytqanına köre, gece Aqyarğa suv üstü dronlar ücüm etti – bir uçucısız yoq etilgen, ekincisi özü patlağan.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
