Ukraina Tış işler nazirligi mayısnıñ 9-ı arfesinde Aqyar merkezinde qoyulğan sovetlerniñ lideri İosif Stalinniñ sureti aqqında malümatqa cevap berdi.
«1944 senesi onıñ (Stalinniñ – QA) rejimi kütleviy etnik temizlev yaptı – üç kün içinde 190 biñden çoq qırımtatarı ayvan vagonlarında Asiyağa sürgün etilgen edi. Yollarda can bergenler çoq oldı. Rusiye yerli ealini aqaretlemek fırsatlarını qaçırmay», – dep aytıla Ukraina nazirliginiñ Twitter haberinde.
Rusiye işğal etken Aqyarda mayısnıñ 9-ı arfesinde merkeziy General Petrov soqağında Stalinniñ süreti ve «Bu ğalebe bizim» yazısınen banner asıldı.
Aqyarda mayısnıñ 9-nda koronavirus qırğınlığı ve vatandaşlarnıñ özüni izolâtsiya etüv rejimine baqmadan, bir sıra tantanalı merasim keçirilecek. Gemi ve aviatsiya paradı olacaq.
Rusiye Mudafaa naziri Sergey Şoygu mayısnıñ 9-nda Aqyarda ve Keriçte bayram salütlarınen bağlı emir berdi.
Rusiye işğal etken Qırımda 2014 senesinden soñ «Zafer künü» sovet ve Rusiye bayramı Qızıl Ordu ve sovet halqınıñ natsist Almaniyanı yeñgen bayramı olaraq qayd etilmekte. Ukrainada mayısnıñ 8-nde Hatıra ve barışıq künü qayd etilmekte, mayısnıñ 9-nda – Ekinci cian cenkinde natsizmni yeñüv künü.
