Yerli vaqıtqa ile saat 08:41-de Aqyarnıñ merkezinde patlav eşitildi. Bundan evel ise, reakiv sistemalarnıñ ateşke berilgenine oşağan bir ses eşitildi. Rusiye akimiyeti vaziyetni resmiy şekilde izaatlamadı.
Keriç köprü de saba qapatıldı. ''Krımskiy veter'' telegram-kanalı Qara deñiz ve Krasnoperekopsk rayonlarında küçlü sesler aqqında haber etti. Bu malümatnı mustaqil menbalardan tasdıqlamaq mümkün degil.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
