Rusiye kontrolindeki Aqyar şeer mahkemesi 2021 senesi martnıñ 24-nde «devlet hainliginde» qabaatlanğan pensioner qadınnı umumiy rejimli koloniyada qalmasına üküm etti.
Mahkemeniñ matbuat hızmeti martnıñ 29-nda bildirgenine köre, cinaiy dava qapalı rejimde baqıldı, çünki «davada devlet sırı olğan malümat bar edi».
«Aqyar şeer mahkemesiniñ qararınen vatandaş D. Rusiye Federatsiyası Ceza kodeksiniñ 275-inci maddesine istinaden cinayet yapqanında qabaatlı tanılıp, umumiy rejimli koloniyada 12 yıl qalmasına ve azatlığınıñ 1 yılğı sıñırlanmasına üküm etildi», – dep aytıla haberde.
Qayd etilgenine köre, cinaiy dava baqıluvı neticesinde belli oldı ki, 1955 senesi Bağçasarayda doğma qadın «çetel devletiniñ vekili tarafından Ukraina Mudafaa nazirliginiñ Baş istihbarat idaresi ile gizli işbirligine celp etildi».
«Vatandaş D. şartlı isim, dalğa ve anahtar, radio stantsiyalarınıñ indeksleri, radio tanıtma signallarınıñ indeksleri ve nevbetçi radiocı cedvelleri, telefon, telegraf, radio ve tanıtma signallarını aydınlatqan Qara deñiz flotunıñ ayrı aviatsion alayı aqqında devlet sırı olğan ve Rusiye Federatsiyasınıñ telükesizligine zarar ketire bilgen malümat toplamaqtan ibaret istihbarat vazifelerini yerine ketirgen edi», – dep aytıla mahkeme qararında.
Üküm etilgen qadınnıñ adı ve soyadı mahkeme malümatında aytılmay, amma açıq menbalardan belli olğanına köre, qadınnıñ adı Galina Dovgopolaya ola. Onıñ ya da advokatınıñ izaatları yoq.
Fevral ayında berilgen malümatqa köre, mahkeme Dovgopolayanıñ davasını temelden baqıp başladı. Qırımdan Moskvadaki «Lefortovo» SİZOsına avuştırılğan qadın aynı kamerada qalğan diger qadın tarafından bir qaç kere köteklengen soñ başqa kamerağa alındı.
2019 senesi noyabrniñ soñunda Rusiye Federal telükesizlik hızmeti işğal etilgen Aqyarda Ukraina Mudafaa nazirliginiñ istihbaratı içün casuslıqtan şübheli olğan qadın tutuldı, dep bildirgen edi. 2020 senesi devamında sıñırlav tedbiri bir qaç kere uzatılğan edi.
