Rusiye kontrolindeki Aqyar şeer mahkemesi şeerniñ 66 yaşında sakini Aleksandr Gluhoyedovnı 18 yılğa azatlıqtan marum etti. Rusiye uquq qoruyıcıları onı devlet hainliginde ve patlayıcı saqlağanında qabaatlağan eken.
Berilgen malümatqa köre, erkek Rusiye Qara deñiz flotunıñ gemileri ve olarnı qoruv vastalarını közlep fotoresim çıqarğan, Rusiye arbiyleriniñ maşinalarını taqip etken.
2025 senesi yanvar ayında Rusiye FSB hadimleri onı tuttı, patlayıcı cihaz tapılğan eken.
Cenk vaqtında Rusiye uquq qoruyıcılarınıñ malümatını teşkermek imkânsız ola, Gluhoyedovnıñ qabaatlav ve üküminen bağlı açıq izaatları ise yoq.
Rusiyede ve işğal etken topraqlarında uquq qoruyıcılar Ukrayina tarafdarlarını taqip ete. Rusiye tarafdarı olğan qırımlı bloger Aleksandr Talipov öz Telegram kanalında Ukrayinağa qoltutqan Qırımlılarnıñ şahsiy malümatını derc ete. Böyle şikâyetler neticesinde qırımlılar RF ordusını "itibardan tüşürgenleri" içün tutula ve memuriy ve cinaiy mesüliyetke çekile.
Aq qorçalayıcılar Rusiye uquq qoruyıcıları Qırımda devlet hainligi, Ukrayina ile işbirligi, casuslıq ve diversiya maddelerine istinaden açqan davalarınıñ sayısı artacaq, dep tahmin ete. 2014 senesinden evel böyle davalarnıñ sayısı yılda eñ çoq 10 olsa, şimdi FSB böyle davalarnı aman-aman er kün aça.