Aqyar limanına “Tsezar Kunikov” ve “Azov” Qara deñiz flotunıñ eki desant gemisi kirdi, dep bildire Rusiye Qara deñiz flotunıñ matbuat hızmeti.
Gemiler, Qırımnıñ Opuk poligonında keçirilgen ava-desant ordularınıñ ögrenüvlerinden soñ qayttı.
“Ögrenüv devamında“Tsezar Kunikov” ve “Azov” gemileriniñ ekipajları, şahsiy taqımınıñ minme ve enmesini idman etti, deñiz ve topraq nişanlarına atuvlarnı yaptı”, - dep bildirdiler flotnıñ matbuat hızmetinde.
Daa evel Rusiye askerleri ilhaq etilgen Qırımda 10 biñ topçu ve 3 biñ dane silânı qullanıp, arbiy ögrenüvler keçirecek ola edi. Rusiye matbuatı bildirgeni kibi, ögrenüv vaqtında “İskander-M”, “Bal”, “Bastion” raketalı kompleksleri ve başqa silâdan atışlar yapılacaq. Ögrenüvler 20 poligonda keçirilecegi bildirile: Astrahan, Rostov, Volgograd vilâyetlerinde, Krasnodar ve Stavropol ülkelerinde ve Şimaliy Kavkaz cumhuriyetinde, bundan ğayrı Abhaziya, Ermenistan, Cenübiy Osetiya ve ilhaq etilgen Qırımda yerleşken Rusiye arbiy bazalarında.
2014 senesi Qırım işğalinden soñ, Rusiye yarımadada arbiy ögrenüvlerni muntazam tarzda keçire. Ukraina Baş ştabında, rusiye arbiy adamlarınıñ Qırımdaki areketleri qanunlarğa qarşı kele dep aytalar.
