İyülniñ 9-nda Aqyarda 119 yañı COVID-19 hastası qayd etildi, 71 yaşından 81 yaşına qadar üç insan vefat etti. Bu aqta Rusiye kontrolindeki şeer ükümetiniñ matbuat hızmeti bildirdi.
«Umumen Aqyarda 17 680 insan yañı koronavirus yuqunçına oğradı. 15 388 kişi yahşı oldı, 771 insan vefat etti. 491 insan közetile – bu insanlar hastalarnen alâqada oldı, COVID-19 diagnozı tasdıqlanmadı», – dep aytıla haberde.
Cumaaqşamı künü, iyülniñ 8-nde, Aqyarda 115 yañı koronavirus hastası qayd etildi, 71 yaşından 85 yaşına qadar dört insan vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
