Koronavirus telükesi sebebinde Aqyar kirişindeki qoyulğan nezaret noqtalarını közetüv kameralarınen donattılar. Bunı şeerniñ rusiyeli başı Mihail Razvojayev yerli STV telekanalınıñ efirinde ayttı.
"Bu afta blokpostlarnı kameralarnen donattıq. Video yazılacaq", - dedi Razvojayev.
Şeer ükümetiniñ başı, "kameralarnıñ yazuvları mesuliyetli memurlarnıñ kabinetleri"nde yayın etilecegini qayd etti.
Mayıs 18-inden başlap şeerde özüni izolâtsiya etüv rejimini lâğu ettiler. Amma Aqyar kirişindeki teşkerüv noqtaları alâ daa işini devam ete.
Qırımnıñ Rusiye akimiyeti malümatına köre, bugünge qadar 326 yañı koronavirus hastası qayd etildi, 9 koronavirus hastası vefat etti. Aqyarda 154 yañı koronavirus hastası qayd etildi, eki kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
