Rusiye atiqiyatçıları (arheolog) Aqyarnıñ Karantin körfeziniñ tübünde qadimiy çölmekçiler ustahanesiniñ qalıntılarını taptı, dep bildirdi “Tavriyalı Hersones” qoruq müzeyiniñ hadimi Andrey Bukatov.
“Karantin körfezinde amfora işlep çıqaruvınıñ batqan qısmı tapıldı. Küçük terenlikte amfora parçaları,qusurlı mahsulnıñ toplamları bar”, - yaza Bukatovnıñ sözlerinden TASS.
Amma çölmekçiler ustahanesini şimdilik daa tapmadılar, dep bildire atiqiyatçı: o asırlar devamında suv tübüne batqan topraqlarda ola bile, ya da yalıda, ya asıl yoq etildi. Tapılğan amfora parçalarınıñ episi bir Qara deñiz çeşitine ait.
Yapılğan vaqtı - tahminen milâttan soñ VII-IX asır.
TASS yazğanı kibi, atiqiyatçı, kelecekte Aqyar körfezlerniñ tübü tetqiq etilecek, balçıqnıñ qalın qatlamı tübünde atiqiyat artefaktları ola bile.
