Kreml nezaretindeki Aqyar (Sevastopol) akimiyeti ilhaqnıñ beş yıllığını qutlav tedbirleri cedlevilini tasdıqladı.
Rusiyeli şeer akimiyetiniñ saytı bildirgenine köre, fevral 23-ünde Yekaterina skverinden, “Aqyar samooboronası”nıñ, 1941-1945 yılları Aqyarnıñ qaramaniy mudafaası Eykeline qadar yürüşi olacaq.
Mart 15-17-sine “Russkaya vesna” (“Rus baari”) yelken regatası ve, “Noçnıye volki” rusiye baykerleri teşkil etken Aqmescit-Aqyar-Gasforta dağı yolunen avtoyürüş niyetlenile.
Bundan ğayrı, mart 16-sında Aqyar memurları, Aqmescitte “referendum”nıñ beş yıllığına bağışlanğan yürüşte iştirak etecek. Aynı şu künü Aqyarnıñ qaramaniy mudafaa ve azat etüvi Devlet müzeyinde, “Biz beraber” medeniy-vatanperver festivali açılacaq.
Bildirile ki, o künü, 2014 senesi mart 16-sında doğğan balalar içün “Rus baariniñ balaları” adlı bayram keçirilecek.
Nahimov meydanında ise Aqyar memuriyeti Rusiye bayrağını yaydıracaq ola (mart 18-de).
Şu künü aqşam aqyarlılar ve şeer musafirleri içün kontsert azırlanacaq.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
