İyülniñ 23-ne keçken gecesi Aqyar kene uçucısız uçaqlarnıñ ücümine oğradı, dep bildirdi Rusiye kontrolindeki şeer yolbaşçısı Mihail Razvojayev telegram kanalında. Bundan da ğayrı, iyülniñ 23-nde saba Keriç köpründe avtotransport areketi toqtatıldı.
Onıñ aytqanına köre, Şimaliy taraf ve Fiolent rayonında Rusiye arbiyleri akvatoriya üzerinde 15-ten ziyade uçucısız uçaqnı yoq etti.
Razvojayevniñ bildirgenine köre, uçaqnıñ parçaları bağça yoldaşlıqlarından birinde tüşti, yük maşnasınıñ camı sındı. Ekinci pilotsız uçaqnıñ parçaları daa bir Bağçılıq ticariy olmağan şirketi civarındaki evniñ yanında tüşti. Razvojayevniñ sözlerini alternativ menbalar yardımınen tasdıqlamaq şimdilik imkânsız.
Bundan da ğayrı, iyülniñ 23-nde saba Rusiye akimiyetiniñ nezaretindeki Keriç köpründeki operativ vaziyet aqqında telegram-kanalı, avtotransport areketiniñ toqtatılğanı aqqında haber ete edi. Köpür qırq daqqa devamında qapalı edi. "Krımskiy veter" teleqram kanalı Keriçte Rusiye ava mudafaasınıñ çalışması ve Canköyde patlav sesleri aqqında haber etti. Rusiye ve Ukrayina arbiyleri vaziyetni şimdilik izaatlamadı. Bu malümatnı alternativ menbalardan teşkermek şimdilik imkânsız.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
