Aqyarnıñ işğal yolbaşçısı Mihail Razvojayev iyünniñ 21-nde saba Aqyarğa uçucısız uçaqlarnıñ ücüm etkenini bildirdi.
Eñ azından dört dron aqqında söz yürsetile. Monastır şossesi rayonında yıqılğan parçalar neticesinde ot yandı, dep bildire memur.
Qırım.Aqiqatnıñ malümatına köre, Fiolent burnu civarında saba saat altılarda uzun bir "vızıldı" sesi eşitildi. Bunıñen beraber ava telükesi ilân etilmedi.
Rusiye akimiyeti, zarar körgenler ve yıqıluvlar yoq, dep bildire.
Rusiye Mudafaa nazirligi, ava mudafaası sisteması geceleri Qırım ve Qara deñiz üzerinde 70 dronnı urıp tüşürgenini bildirdi. Muarririyet bu malümatnı tasdıqlap olamay.
Tünevin aqşam nezaret kanalları Qırımğa uçucısız uçaqlarnıñ ücüm etkeni aqqında haber etken edi. Qara deñizde tahminen 20 uçaq urıp tüşürildi, dep bildirilgen edi. Qırım.Aqiqatnıñ malümatına köre, Aqmescitte patlav sesi eşitildi. "Krımskiy veter" telekanalı Yalta civarında da patlav eşitilgenini bildire.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
