Aqyar civarındaki Hmelnitskoye qasabasında Rusiye arbiy hızmetçisi öz hızmetdeşleri ve sakinlerge ateş açtı, dep bildire Rusiye kontrolindeki Aqyar yolbaşçısı Mihail Razvojayev.
Berilgen malümatqa köre, bir Rusiye askeri elâk oldı, daa biri yaralandı. Bundan soñ, ücüm etken kişi köyde daa üç insannı yaraladı ve üç vatandaşnı öldürdi: 71 ve 59 yaşında eki erkek ve 64 yaşında bir qadın.
Razvojayevniñ bildirgenine köre, al-azırda Rusiye arbiyi tutulğan. Onıñ adı ve mevamı bildirilmey.
Bu sene Sabanda Qırımnıñ Canköy rayonınıñ Stefanovka köyünde 49 yaşında yerli sakin, evine "operativ-qıdıruv tedbirlerini keçirmek içün" kelgen Rusiye quvetçilerine ateş açqan edi.