Aqyarda künniñ ekinci ava telükesi ilân etildi, dep haber ete Rusiye kontrolindeki şeer yolbaşçısı Mihail Razvojayev içtimaiy ağlardaki saifelerinde.
Bu haber saat 13:37-de derc etildi. Bundan evel saat 2:52-de ava telükesi ilân etildi ve aman-aman bir saat devam etti.
Rusiye monitoring telegram kanalları uçucısız telükesi aqqında yaza. Cenk vaziyetinde bu malümatnı teşkermek zor ola.
Rusiye arbiyleri vaziyetni şimdilik izaatlamay.
Mayısnıñ 28-nde gece ve saba Qırımda ve Aqyarda patlav ve atışlar eşitildi, yarı geceden soñ uçucısız telükesi ilân etildi. Aqyarda saat 02:57-de patlav oldı, onı şeerniñ Şimaliy tarafında ve Bağçasaray rayonında eşitkenler. Saat 05:15-te "Kaça" uçaq alanı rayonında eki küçlü patlav oldı ve Aqyar tarafına uçqan qırıcı köründi.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etkenini tasdıqlamay.