İşğal etilgen Qırım ve Aqyarda gece ve saba uçucısız ücümi sebebinden ava telükesi ilân etildi, Rusiye ava mudafaası çalıştı, atışlar eşitildi, Ermeni Bazarda darbe endirildi.
"Krımskiy veter" Telegram kanalı abunecileriniñ malümatına esaslanıp haber etkenine köre, yarı geceden evel Ermeni Bazarda demiryol vokzalı yanında ücüm oldı, küçlü yanğın çıqtı.
"Krımskiy veter" yazğanına köre, içecek yapqan "Krım-Kula" müessisesinde issi signaturları qayd etildi. Tasdıqlanması kerek olğan malümatqa köre, bu yerni Rusiye arbiyleri qullana. Al-azırda ücüm nişanı ne oldı ve bu darbe ya da parçalar oldı belli degil. Telegram kanalı qayd etkenine köre, "FSB Sıñır hızmetiniñ binası yaqın yerleşe, yollarda arbiy eşelon buluna".
Gece Aqmescitte Tavriya TES tarafından, Qarasuvbazar rayonında, Barabanovo, Petrovo, Çuqurça, Balanovo köyleri yaqınlarında atış eşitildi.
İşğal etilgen Aqyarnıñ Rusiye yolbaşçısı Telegram kanalında gece ve saba ava telükesi signalını ilân etti, saat 8:34-te telüke toqtatıldı.
Rusiye Mudafaa nazirligi saba beş Rusiye vilâyeti ve işğal etilgen Qırımda 59 ukrayin uçucısıznıñ yoq etilgenini bildirdi.
Ukrayina arbiyleri Qırımda gece adiseleri aqqında malümatnı izaatlamadı.