Aqyarda yerli vaqıtnen saat 23:07-den başlap ve sabağa qadar ava telükesi ilân etildi, Rusiye akimiyeti uçucısızlarnıñ şeerge ücümi aqqında bildirdi.
Rusiye kontrolindeki Aqyar şeer yolbaşçısı Mihail Razvojayevniñ Telegram kanalında yazğanına köre, Rusiye Federatsiyasınıñ Ava mudafaası 26 dron urıp tüşürgen eken. O, ücüm neticesinde erkek elâk oldı, dep bildire.
"Ücüm vaqtında Kamışovoye şosse rayonındaki soqaqlardan birinde bulunğan 30 yaşında er adam elâk oldı. O, başından ve köksünden urılğan uçucısıznıñ parçalarından yaralandı. Acele yardım adise yerine tez kelip, reanimatsion areketlerini yaptı, amma qurtaramadılar", – dep yazdı Razvojayev.
Bundan ğayrı, o, Marşal Krılov soqağı civarında eki çoq qatlı evniñ camları qırıldı, Stavkovıy aralığında 6 mustaqil ev zarar kördi. Al-azırda bunı teşkermek zor.
"Fedorovskaya soqağı rayonında evniñ yan tarafına urıp tüşüriilgen uçucısızdan büyük parça tüşti. 3 daireniñ camları qırıldı, gaz borusı zarar kördi. Boris Mihaylov soqağında uçucısız parçaları tapıldı ve çoq daireli evlerden birinde bir qaç pencere zarar kördi. 11 maşina zarar kördi. Tüşürilgen uçucısızlar ücüm maden topçıqlarınen tolu edi", – dep qoştı Razvojayev.
Aqyar rayonında patlavlar aqqında "Krımskiy veter" Telegram kanalı da yazdı. Kanal abunecileriniñ malümatına köre, Rusiye Ava mudafaası "Belbek" ve "Kaça" Rusiye uçaq alanları rayonlarında faal çalıştı. Ücümlerniñ aqibetleri şimdilik belli degil. Ukrayina arbiyleri bu haberlerni izaatlamadı.
2022 senesinden başlap, Qırım yarımadasınıñ territoriyasına aman-aman er kün pilotsız uçaq ve raketalar ücüm ete, bu malümatnı teşkermege imkân olsa da, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etkenini tasdıqlamay.