Rusiye akimiyeti 35 yaşında Aqyarlı advokat Amet Abultairovnı "devlet hainliginde" qabaatladı. O, qaynatası Vitaliy Şçurovnen beraber 2024 senesi noyabr ayında Rusiye uquq qoruyıcıları tarafından tutuldı, dep bildirdi Qırımtatar resurs merkeziniñ meneceri Zarema Bariyeva Facebook saifesinde.
Onıñ aytqanına köre, Abultairov tutulmazdan evel Aqyarda uquqçı olaraq çalıştı. O, topraq ve mesken davaları, mulk bölüşüvi ve qullanıcı aqlarını qorçalav davalarınen oğraştı. 2024 senesi noyabrniñ 1-nde FSB hadimleri Amet Abultairovanı Aqyarda tuttı.
O kün qaynatası 54 yaşında Vitaliy Şçurov da tutuldı. Bariyevanıñ malümatına köre, erkek Aqyarda kiçik biznesnen oğraştı ve kiyevinen beraber iş faaliyetine celp etildi.
Başta eki erkek de Aqyar SİZOsında tutuldı, soñra qanunsız bir şekilde Moskvağa, "Lefortovo" SİZOsına etap etildi. Bariyeva qayd etkenine köre, şimdi ekisi de üküm etildi ve istinaf şikâyetleriniñ baqılmasını bekley.
Vitaliy Şçurov Aqmescit №2 SİZOsında buluna. Amet Abultairov etap etilgen soñ Rusiyeniñ Krasnodar ülkesindeki №1 SİZOda beseda.
"Mına qoranta repressiyalarınıñ daa bir örnegi, barışıqsever ayattan qoparılğan aileniñ bütün erkekleri apiske oğradı", – dep yazdı Bariyeva.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı olğan Qırımlı bloger Aleksandr Talipov öz telegram kanalında Ukrayinağa qoltutqan Qırımlılarnıñ şahsiy malümatlarını derc ete. Böyle şikâyetlerniñ neticesinde Qırımlılar RF ordusını "itibardan tüşürüv" içün yaqalana ve memuriy ve cinaiy mesüliyetke çekile.
Aq qorçalayıcılar, Qırımda Rusiye quvetçileri tarafından açılğan devlet hainligi, Ukrayina ile işbirlik, casuslıq ve diversiya maddeleri boyunca davalarnıñ sayısı artacağını tahmin eteler. Şimdi FSB bu kibi davalarnı aman-aman er kün aça 2014 senesine qadar ise yılda 10 dava açıla edi.