Aqyar başı Mihail Razvojayev, "Gornıy" ve "Laspi" bala lagerlerini açmağa buyurdı. Bunı o koronavirus boyunca operativ ştabnıñ oturışında ayttı.
Akimiyetniñ malümatına köre, ilim ve tasil bölüginiñ müdiri Yelena Bogomolova, "Gornıy" bala lageri iyül 14-ünde, "Laspi" ise iyül 15-inde açılacağını bildirdi. Amma Mihail Razvojayev olarnı ertece açmağa teklif etti.
"Teşkiliy taraftan er şey azır. Vesiqalarnıbir qaç künde yaparmız. Lagerlerni iyül 6-sında açmağa teklif etem", - qayd etti Razvojayev.
Aynı vaqıtta, Kazaçya buhtada 57-nci ve 59-ıncı mekteplerniñ bazasında avgusttan başlap tasil lagerleri çalışıp başlaycağı qayd etile. İyül ayında mektep müessiseleri yañı oquv yılına azırlanacaq.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
