Oktâbrniñ 22-si sabasına Aqyarda 55 yañı COVID-19 hastası qayd etildi, dep haber ete şeerniñ Rusiye ükümeti.
«Hastalar – 4 yaşından 85 yaşına qadar yerli sakinler. 44 insan tüzelgen soñ hastahaneden yiberildi. 46 ve 81 yaşında eki er adamı vefat etti. Ekisiniñ de hronik hastalıqlarını eki taraflı virus-bakterial pnevmoniyası ağırlaştırdı», – dep aytıla haberde.
Yılnıñ başından Aqyarda, yerli akimiyetniñ malümatına köre, 1798 insan yañı koronavirus yuqunçına oğradı, 1192 kişi tüzeldi, 55 insan vefat etti.
«Bugünki künde COVID-19 diagnozı tasdıqlanğan 252 insan hastahanede buluna: 108 insan – yuqunç hastahanesinde, 136 kişi – doquzıncı şeer hastahanesinde, sekiz insan – Mudafaa nazirliginiñ hastahanesinde. «İzumrudda» – 63 insan», – dep qoştı müessise.
Haber etilgenine köre, 202 insan ambulator tedaviylevde buluna, 417 insan közetile – hastalarnen alâqada olğan insanlar, COVID-19 olarda tasdıqlanmadı, dep qayd ete ükümet.
Qırımda keçken künü 212 koronavirus hastası qayd etildi.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
