Aqyarda yuvunma mevsimi iyünniñ 1-inde başlap, sentâbr 15-ine qadar devam etecek. Böyle qararnı şeerniñ rusiyeli akimiyeti bazarertesi künü oturışta qabul etti.
Akimiyetniñ matbuat hızmeti bildirgenine köre, şimdilik plâjlarnıñ mevsimge azırlanması yapıla.
“Bu vesiqanı qabul etilüvi, plâjlarnıñ qabul etilüvini başlamağa yol berecek. Bizde umumen 36 plâj bar, olarnıñ ekisi - operatorlarnen kontrakt tizmekniñ soñ basamağındalar, qalğanlarnıñ operatorları endi belli. Eki plâj - Balıqlava ve Uşakov yılğasında - sanepidemnadzornıñ razılığını endi aldı”, - dep qoştı Tarasov.
Keçken yıl şeerniñ rusiyeli başı Dmitriy Ovsânnikov, kirağa alğanlar plâj abadanlaştıruvınıñ keyfiyetini kötermese, olarnen kontraktlarnı bozacağı aqqında bildirdi.
