Aqyarda noyabrniñ 27-nde saba 58 yañı COVID-19 hastası qayd etildi. 16-sı yuqunç ve doquzıncı şeer hastahanelerine alındı, qalğanları ambulator tedaviylevde buluna, dep bildirile Aqyarnıñ Rusiye ükümeti saytında.
Akimiyetniñ malümatına köre, hastalar – eki yaşından 91 yaşına qadar insanlar. Qayd etilgenine köre, bir künde 68 ve 75 yaşlarında er adamları vefat etti.
«Bugünki künde COVID-19 diagnozı tasdıqlanğan 166 kişi hastahanede, 71 insan «İzumrudda», 202 insan ambulator tedaviylevde buluna, 70 kişi tüzelgen soñ hastahaneden çıqarıldı», – dep aytıla haberde.
Umumen, akimiyetniñ malümatına köre, yılnıñ başından Aqyarda 4156 insan koronavirus yuqunçına oğradı, 3648 kişi tüzeldi, 114 insan vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
