Aqyarnıñ işğal yolbaşçıları yanvarniñ 16-nda RF ava mudafaası sistemaları Qara deñiz üzerinde yedi pilotsız uçqan cihaznı urıp tüşürgenini bildirdi.
"Episi olıp Qara deñiz flotunıñ ava mudafaası vastaları deñiz üzerinde artıq yedi pilotsız uçqan cihaznı urıp tüşürdiler. Em şeerde, em akvatoriyada zarar körgen obyektler yoq. Qayd etem: deñiz üzerindeki bütün pilotsız uçaqlar urıp tüşürildi", - dep yazdı Razvojayev.
Bundan evel Razvojayev deñiz üzerinde urıp tüşürilgen üç pilotsız uçaq aqqında bildirgen edi. Onıñ sözlerine köre, pilotçız uçaqlarnıñ birisi Belbek tarafına uça edi.
Cenk vaziyetinde malümatnı teşkermek imkân yoq. Rusiye ve Ukrayina arbiyleriniñ resmiy izaatları şimdilik yoq.
Yanvarniñ 16-na keçken gece Qırım.Aqiqat mühbiri şiddetli patlav sesi aqqında haber etti. Aqyarnıñ işğal yolbaşçısı Mihail Razvojayev şeer üzerinde pilotsız uçqan cihaznıñ urıp tüşürilmesi aqqında bildiri.
Avgusttan başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayına uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksenov uçucısızlarnı yarımada içün «esas telüke» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
