Gece Qırımda patlavlar oldı, Ukrayin dronlarınıñ uçuşları oldı, Rusiyeniñ mobil ateş gruppaları çalıştı, Aqmescitteki Wildberries anbarında ve İslâm Terek rayonındaki elektrik stansiyasında yanğınlar çıqtı, Aqyarda ava telükesi ilân etildi, dep bildire yerli telegram kanalları ve Rusiye akimiyeti.
Bir qaç kere patlav ve ateş sesleri Saq rayonında, Aqyarda, Kefede, Aqmescitte, Kezlevde oldı.
"Krımskiy vetr" telegram-kanalı "Wildberries"niñ Aqmescitteki anbarına darbe endirilgeni aqqında yazdı.
Wildberries şirketiniñ matbuat hızmeti saat 01:40 şirketniñ "Aqmescitteki sıralav merkezi telükesizlik talaplarına köre tahliye etildi", dep bildirdi, amma bu qararnıñ sebebini aydınlatmadı.
Daa soñra "Krımskiy vetr" şirketiniñ Aqmescitteki anbarında olğan yanğınnıñ videosını ve fotoresimini derc etti.
Telekanalnıñ monitoring hızmeti, uydu malümatına esaslanıp, "Aqmescitteki Wildberries anbarındaki yanğın kosmostan yahşı körüne", dep bildirdi.
"Krımskiy veter" uydudan alınğan malümatqa esaslanıp, Qırımnıñ İslâm Terek rayonında küçlü elektrik stansiyası yanğanını bildire.
İlk yazda Qırımdaki arbiy ve energetika obyektleri, Rusiye logistik yolları Ukrayina Silâlı quvetleriniñ eñ büyük ücümlerine oğray. Er kün yañı nişanlarğa darbeler aqqında haber etile, Qırımda yaqarlıq qıtlığı sebebinden adiy insanlarğa benzin satılmay, elektrik energiyası cedvelge köre berile, Keriç köpründe ise nevbetler bar. Bala şifahane müessiseleri ve lagerleri sentâbr ayına qadar raatlanğanlarnı qabul etmey.
Ukrayina Mudafaa naziri Mıhaylo Fedorov darbelerniñ maqsadını añlattı – "Qırım dronlarnen izolâtsiya etile". Onıñ aytqanına köre, bu "rusiyeliler içün pek beklenilmegen aqibetlerge yol aça bile".
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.