Rusiye kontrolindeki Aqmescit memuriyeti şeerlilerni suvnen teminlev vaziyetini «stabil» dep saya. Bu aqta sentâbrniñ 30-nda şeer memuriyetiniñ yolbaşçı muavini Anatoliy Rusin ayttı.
Onıñ bildirgenine köre, şeerniñ bazı rayonlarında suv berüv cedveli «biraz» bozuldı.
«Muracaat sayısı bayağı eksildi, demek ki, eali suv ala. Bugün saba bir sıra adres boyunca suv cedvelden 30-40 daqqa keç berildi. Bu malümat «Voda Krıma» müessisesine berildi. Oktâbrniñ 1-nde suv berilüvi sıñırlanacaq rayonlarda gece yedek savutlarına suv ketirildi», – dep bildire memurnıñ aytqanlarını memuriyetniñ matbuat hızmeti.
Daa eki kün evelsi Aqmescit memuriyeti şeer sakinleri suv berüv problemlerini şikâyet etmege devam ete, dep bildirdi – suv az kele ve suv berüv cedveline riayet etilmey.
Aqmescit memuriyeti oktâbrniñ 1-2-nde suv teminlevi sıñırlanacaq, dep bildirdi.
Rosgidromet sentâbrniñ 30-nda yağanaqlarnı arttırmaq içün Aqmescitke uçaq keldi, dep bildirdi.
Sentâbrniñ 7-nden itibaren Aqmescitte, Bağçasaray ve Aqmescit rayonlarında qurğaqlıq ve suv anbarlarında suv azlaşqanı sebebinden suv berüv sıñırlarınıñ üçünci, eñ sert etapı başlatıldı.
Qırımnıñ Rusiye ükümeti bildirgenine köre, yarımadanıñ suv teminatı ile «eñ yaramay stsenariyge» azırlanalar. Kreml kontrolindeki Qırım yolbaşçısı Sergey Aksenovnıñ bildirgenine köre, Rusiye Qırımnıñ suv teminatı vaziyeti fevqulâde olğanını tanıy. O, 2020 senesi 150 yıl içinde eñ quru oldı, dep bildirdi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
