"Mudafaa tarafı ev tayin etmekni rica etti, Kurtnezirov bir yerge gizlenmeycek, dep söz berdi. Onıñ Qırımda küçlü içtimaiy bağları, işi, qorantası, qart babası bar. Amma makeme taqiqatçınıñ muracaatını qanaatlendirdi", — dep bildirdi advokat Safiye Şabanova.
Qayd etilgenine köre, yaqalanğan qırımlılarğa qarşı sıñırlama tedbir alınması içün bütün makeme oturışuvları qapalı şekilde keçirilecek. Rusiye polisiniñ hadimleri tutulğan qırımtatarlarğa qoltutmaq içün kelgen diñleyicilerni dağıtmaqnı talap etti.
Kurtnezirovnıñ ömür arqadaşı Safiye Yakubova, Rusiye quvetçileri saba evlerine kirip, aqayını yerge yatqızıp, vesiqa ve telefonlarını talap etkenini tarif etti. Bundan ğayrı, o, quvetçiler Rusiye Federatsiyasında yasaq etilgen edebiyatnıñ eki nushasını qoyğanlarını, em de noutbuknı, eki telefonnı ve vesiqalarnen barsetkanı tutıp alğanlarını ayttı. Kurtnezirov RF Ceza kodeksiniñ 205.5 maddesiniñ 2-nci qısmına ıstinaden qabaatlana (terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv).
Fevralniñ 5-nde saba Rusiye quvetçileri Qırımda beş qırımtatarnı yaqalağanları belli oldı. Qırımnıñ Canköy ve İslâm Terek rayonlarında saba saat 4-te FSB hadimleri Emir Kurtnezirov, Abibulla Smetlâyev, Rustem Mustafayev, Mırzaali Tacıbayev ve Bahtiyar Ablayevniñ evlerine tintüvlernen keldi.
Tintüvlerden soñ qırımlılarnı tahqiqat tedbirleri keçirilmesi içün Aqmescitteki FSB idaresine alıp kettiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
