İyülniñ 27-nde Rusiye nezareti altındaki Qırım Yuqarı mahkemesiniñ binası ögünde Rusiye quvetçileri tarafından tutulğan dört faal Rusiye Federatsiyası Memuriy uquq bozuvları qanunnamesiniñ 20.2.2 maddesini (Cemaat yerlerinde vatandaşlarnıñ aynı vaqıtta kütleviy bulunuvı ve (ya da) areketini teşkil etüv, cemaat yerlerinde vatandaşlarnıñ aynı vaqıtta kütleviy bulunuvı ve (ya da) areketine çağıruv) bozuv içün para cezasına mahküm etilgen, vatandaş jurnalisti Kulamet İbraimov ise 5 künge tevqif etilgen.
Bunı "Qırım birdemligi" cemaat birleşmesi haber etti.
Berilgen malümatqa köre, Aqmescitteki Jeleznodorojnıy rayon mahkemesi siyasiy mabüs Aziz Ahtemovnıñ anası Zarema Ahtemovağa 12 biñ ruble para cezasını berdi, faal Rustem Üseinovğa ise 15 biñ ruble.
"Qırım birdemligi"niñ vatandaş jurnalisti Kulamet İbraimovnı Jeleznodorojnıy rayon mahkemesi Federatsiyası Memuriy uquq bozuvları qanunnamesiniñ 20.2.2 maddesiniñ 4 qısmı ile 5 kün apis cezasına mahküm etti.
Qırımlı uquq qoruyıcı Lutfiye Zudiyeva 12 biñ ruble, siyasiy mabüs Nariman Celâlnıñ ağası Ruslan Celâlov 15 biñ ruble para cezasına mahküm etildi.
Berilgen malümatqa köre, iyülniñ 27-nde mahkeme binası ögünde şikâyet arizası baqılğan Nariman Celâl ve ağa-qardaş Asan ve Aziz Ahtemovlarnıñ tarafdarları toplaştı. Davalarında şikâyet arizası baqılacaq. Aq qorçalayıcılarnıñ malümatına köre, saat 10:30-da 13 insan tutuldı – 10 erkek ve üç qadın.
Berilgen malümatqa köre, Rusiye kontrolindeki Qırım Yuqarı mahkemesiniñ binası ögünde tutulğanlar arasında qırımlı aq qorçalayıcı Lutfiye Zudiyeva, siyasiy mabüs Aziz Ahtemovnıñ anası Zarema Ahtemova, «Qırım birdemliginiñ» mühbiri Kulamet İbraimov ve siyasiy mabüs Nariman Celâlnıñ qardaşı Ruslan Celâlov bar.
2022 senesi sentâbrniñ 21-nde Rusiye kontrolindeki Qırımnıñ Yuqarı mahkemesi Nariman Celâlnı 17 yıl sert rejimli koloniyada qalmasına üküm etti. Bundan ğayrı, 700 biñ ruble para cezası berildi ve azatlığı 1,5 yılğa sıñırlandı.
Asan Ahtemov 15 yıl sert rejimli koloniyada qalmasına üküm etildi. Oña 500 biñ ruble para cezası berildi ve 1 yıl qadar azatlığı sıñırlandı. Aziz Ahtemov 13 yıl sert rejimli koloniyada qalmasına üküm etildi. Oña da 500 biñ ruble para cezası berildi ve azatlığı 1 yılğa sıñırlandı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
