Rusiye kontrolindeki Aqmescitniñ Kiyev rayon mahkemesi martnıñ 28-nde Rusiyeniñ Rostov-na-Donu şeerinde Rusiyede yasaqlanğan «Hizb ut-Tahrir» teşkilâtınıñ faaliyetine alâqaları bar olğanından şübheli sayılıp tutulğan «Qırım birdemligi» cemaat teşkilâtınıñ üç faalini apiske aldı. Bu aqta qırımtatar faali Lutfiye Zudiyeva Qırım.Aqiqat mühbirine bildirdi.
Onıñ aytqanına köre, Remzi Bekirov, Osman Arifmemetov ve Vladlen Abdulkadırov mayısnıñ 15-ne qadar SİZOda tutulacaq.
Mahkeme oturışuvı vaqtında qırımtatar faalleri Rusiye uquq qoruyıcıları tarafından tutulğanda köteklengenini bildirdi. Vladlen Abdulkadırov onı ayaqlarına urğanlar, dep ayttı.
«Abdulkadırov dayana, özüni qabaatlı dep tanımay, malümat bermey. Tutulğanda qarardan ziyade küç qullanıldı, dep sayamız, amma o, özüni bir qarar is ete», – dep tarif etti Abdulkadırovnıñ advokatı Yevgeniy Belousov.
Cumaaqşamı künü Aqmescitniñ Kiyev rayon mahkemesi martnıñ 27-nde Rusiye uquq qoruyıcıları tarafından tutulğanlardan 11 faalini apiske aldı.
Martnıñ 28-nde Rusiyeniñ Rostov-na-Donu şeerinde Rusiye uquq qoruyıcıları Qırımda evleri tintilgen «Qırım birdemliginiñ» üç faali Remzi Bekirov, Osman Arifmemetov ve Vladlen Abdulkadırovnı tutıp aldı. Aqmescitteki mahkeme Abdulkadırovnı mayısnıñ 15-ne qadar ğıyabiy şekilde apiske alğan edi.
Qırımdaki tintüvlerden soñ qıdırılğan qırımtatar faali Edem Yayaçikovnıñ bulunğan yeri alâ daa belli degil.
Martnıñ 27-nde Aqmescitniñ Kiyev rayon mahkemesi tutulğan doquz qırımtatarını tevqif etti.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Faallerniñ malümatına köre, 20 kişi tutuldı.
Aqmescitniñ Bavurçı qasabasında keçirilgen tintüv vaqtında semetdeşlerine qoltutmağa kelgenlerden eki kişi Eskender Mamutov ve Emil Ziyadinov da tutuldı. Aqmescit mahkemesi Ziyadinovğa «politsiyağa qarşı çıqqanı içün» 500 ruble para cezasını berdi. Mamutov ise 5 künge apiske alındı.
Rusiye FSBsi Qırımda tintüvler keçirilgenini tasdıqlap, şübhelilerniñ sayısını ve olarnıñ soyadlarını aydınlatmadı.
Remzi Bekirov, Riza İzetov, Ruslan Suleymanov, Farid Bazarov ve Şaban Umerov Rusiye Ceza kodeksiniñ 205.5 maddesiniñ 1-inci qısmına (terror gruppasınıñ faaliyetini teşkil etüv) istinaden qabaatlana. Qalğanları terror teşkilâtınıñ faaliyetinde (Rusiye Ceza kodeksiniñ 205.5 maddesiniñ 2-nci qısmı) iştirak etkeninden şübheli sayıla.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
