Rusiye kontrolindeki Aqmescitniñ Kiyev rayon mahkemesi martnıñ 27-nde Rusiyede yasaqlanğan «Hizb ut-Tahrir» teşkilâtı ile alâqaları bar olğanından şübheli sayılıp tutulğanlardan 11 qırımtatar faalini tevqif etti. Bu aqta advokat Edem Semedlâyev Qırım.Aqiqat mühbirine bildirdi.
Onıñ aytqanına köre, Ruslan Suleymanov, Alim Kerimov, Rustem Şeyhaliyev, Mecit Abdurahmanov, Yaşar Muyedinov, Bilâl Adilov, Cemil Gafarov, Riza İzetov, İzzet Abdullayev, Asan Yanikov ve Şaban Umerov mayısnıñ 15-ne qadar SİZOda tutulacaq.
«Oturışuvlar qapalı şekilde keçirildi. Bazı qadılar diñlevlerni beş daqqada bitirdi. Olarnı aşatmadılar. Bilgenime köre, soy-soplarına aş bermege izin berilmedi, tek suv içmege rushet bergenler», – dep tarif etti Edem Semedlâyev.
Mahkeme binasını Rusiye uquq qoruyıcıları sarıp aldı. Olar tutulğanlarğa qoltutmağa kelgen insanlardan binadan uzaqlaşmasını talap etti. Olarnı «qanunsız toplaşuvda iştirak etüv içün» (Rusiye Memuriy cinayetler kodeksiniñ 20.2 maddesi) memuriy mesüliyet aqqında tenbiyelegen ediler.
Cumaaqşamı künü mahkeme tahqiqatnıñ Aqmescitteki ekinci «Hizb ut-Tahrir davasınıñ» qalğan mabüslerine sıñırlav tedbiri ile bağlı muracaatlarını baqmaqta. Oturışuvlar qapalı şekilde keçirile.
Martnıñ 28-nde Rusiyeniñ Rostov-na-Donu şeerinde Rusiye uquq qoruyıcıları Qırımda evleri tintilgen «Qırım birdemliginiñ» üç faali Remzi Bekirov, Osman Arifmemetov ve Vladlen Abdulkadırovnı tutıp aldı. Aqmescitteki mahkeme Abdulkadırovnı mayısnıñ 15-ne qadar ğıyabiy şekilde apiske alğan edi.
Qırımdaki tintüvlerden soñ qıdırılğan qırımtatar faali Edem Yayaçikovnıñ bulunğan yeri alâ daa belli degil.
Martnıñ 27-nde Aqmescitniñ Kiyev rayon mahkemesi tutulğan doquz qırımtatarını tevqif etti.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Faallerniñ malümatına köre, 20 kişi tutuldı.
Aqmescitniñ Bavurçı qasabasında keçirilgen tintüv vaqtında semetdeşlerine qoltutmağa kelgenlerden eki kişi Eskender Mamutov ve Emil Ziyadinov da tutuldı. Aqmescit mahkemesi Ziyadinovğa «politsiyağa qarşı çıqqanı içün» 500 ruble para cezasını berdi. Mamutov ise 5 künge apiske alındı.
Rusiye FSBsi Qırımda tintüvler keçirilgenini tasdıqlap, şübhelilerniñ sayısını ve olarnıñ soyadlarını aydınlatmadı.
Remzi Bekirov, Riza İzetov, Ruslan Suleymanov, Farid Bazarov ve Şaban Umerov Rusiye Ceza kodeksiniñ 205.5 maddesiniñ 1-inci qısmına (terror gruppasınıñ faaliyetini teşkil etüv) istinaden qabaatlana. Qalğanları terror teşkilâtınıñ faaliyetinde (Rusiye Ceza kodeksiniñ 205.5 maddesiniñ 2-nci qısmı) iştirak etkeninden şübheli sayıla.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
