Qurmandaki «Hizb ut-Tahrir davasınıñ» ükmüne qarşı berilgen istinaf baqılması beklenilgen Aqmescitteki mahkeme binası ögünde Rusiye quvetçileri 15 qırımtatarını tuttı, dep bildire «Qırım birdemligi».
Faaller tutulğanlarnıñ cedvelini derc etti:
- Ablâlimov Kazim Rasimoviç;
- İbragimov Mir İbragim Mir Vagif öglı;
- Urinbayev Sadık Ruzikuloviç;
- Mustafayev Enver Seitoviç;
- Şihbadinov Rustem Velitoviç;
- Paralamov Reşat Rasimoviç;
- Teyfukov Selim Rişatoviç;
- Mansur Ablâmitov Rustemoviç;
- Memetov Eskender Remziyeviç;
- Memetov Dilâver Remziyeviç;
- Emiruseinov Reşat Asanoviç;
- İbragimov Lenur Musanoviç;
- Alimhan Abitov Alimoviç;
- Umerov Amethan Ayderoviç;
- Mingafarov Gafur Şaripoviç.
«Qırımda insanlarnı tutıp, avtobuslarğa mindirgenler ve polis bölügine alıp ketkenler», – dep bildirdi birleşme. Aynı vaqıtta Vlasiha Arbiy istinaf mahkemesi (Rusiye) mahkemege diñleyicilerni ve kütleviy haber vastalarını kirsetüv muracaatını qanaatlendirdi, dep qayd etile.
Bundan evel mahkeme ögünde bir qaç insannıñ tutulğanı belli oldı.
Rusiye kontrolindeki Qırım uquq qoruyıcıları bugün Aqmescitte olğan kütleviy tutuvlar aqqında bildirmey ve tefsir etmey.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
