Rusiye kontrolindeki Qırım Yuqarı mahkemesi rusiyeli advokat Nikolay Polozovnıñ qırımtatar milliy areketiniñ veteranı Veciye Kaşkanıñ ölümi davasındaki «tahqiqatçınıñ qanunsız areketlerinen» bağlı şikâyet arizasını baqmaqta.
«Tahqiqatçınıñ qanunsız areketlerini şikâyet etem, o, teşkerüv malümatını baqmağa imkân bermedi, andaki malümat (Veciye Kaşkanıñ ölümine alâqası bar ola bilgen İç işler nazirligi ve Rusiye gvardiyasınıñ hadimlerinen bağlı malümat) gizlendi», – dep yazdı Polozov Facebook saifesinde.
Polozovnıñ qayd etkenine köre, birinci instantsiya mahkemesi tahqiqatçınıñ areketlerini «emiyetsiz ve müvekkilim İbram ağa Kaşkanıñ aq ve serbestligine tesir etmey» dep qarar çıqardı.
«Böyle yanaşuv ve baqışqa razı olmağa imkânsız. Bunıñ kibi areketler Veciye Kaşka ölüminiñ sebeplerini mustaqil şekilde tahqiq etmege keder ete», – dep yazdı advokat.
Bundan evel Polozov oña «Veciye Kaşka davasınıñ» FSB videosını baqmağa imkân berilmedi, dep bildirgen edi.
2017 senesi noyabrniñ 23-nde 82 yaşında Veciye Kaşka vefat etti. Qırımtatar milliy areketiniñ veteranı FSB ve SOBR hadimleriniñ mahsus tedbir şaatı oldı. Uquq qoruyıcılar Aqmescit qavelerinden birinde qırımtatarlar Kazim Ametov, Asan Çapuh, Ruslan Trubaç ve Bekir Degermencini tutıp aldı. Olarnı Türkiye vatandaşı Yusuf Aytandan para talap etkenlerinde qabaatlaylar.
Oña qaraman dey ediler. Bir yıl Veciye Kaşkasız (süret toplamı)
FSBniñ resmiy malümatına köre, Veciye Kaşka yaramadı. Qadınğa «tibbiy yardım» çağırıldı, lâkin hastahanege ketkende Veciye Kaşka can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.