Rusiye kontrolindeki Aqmescitniñ Merkeziy rayon mahkemesi «Qırım birdemligi» cemaat birleşmesiniñ mühbiri Ablâmit Ziyadinovğa qarşı davanı qapattı. Bu aqta «Qırım birdemligi» Qırım.Aqiqatqa bildirdi.
«Biz fikrimizni pek tafsilâtlı bildirdik, video baqtıq ve qadı doğru qarar aldı – cinayet olmağanından davanı qapattı», – dep ayttı advokat Rustem Kâmilev.
2020 senesi noyabrniñ 3-nde «Qırım birdemliginiñ» mühbirleri Ablâmit Ziyadinov ve Vilen Temeryanov Rusiye kontrolindeki Qırım garnizon arbiy mahkemesiniñ binası ögünde tutulğan edi. Anda «Hizb ut-Tahrir davasınıñ» mabüsleri Arsen Abhairov, Rustem Emiruseinov ve Eskender Abdulganiyevniñ ükümlerinen bağlı qol tutuv aktsiyasını aydınlatmağa kelgen ediler. O künü mabüsler büyük apis cezalarına üküm etildi. Mühbirlernen beraber faal Erfan Bekirov da tutuldı, o, mahkemege siyasiy mabüslerge qol tutmağa kelgen edi. Ziyadinov ve Temeryanovnıñ matbuat kartları ve muarririyet vazifeleri bar edi.
Uquq qoruyıcı organlarınıñ hadimleri aytqanına köre, noyabrniñ 3-nde Grani.ru neşiri ve «Qırım birdemliginiñ» mühbiri 2020 senesi aprelniñ 1-nde Rusiye Memuriy bozuvlar kodeksine kirsetilgen Rusiye Memuriy bozuv kodeksiniñ 20.6.1 maddesine istinaden (Fevqulâde vaziyetler vaziyetinde ya da olma telükesinde areket qaidelerine riayet etmeme) özüni izolâtsiya etüv rejimini bozdı.
