Rusiye kontrolindeki Aqmescit mahkemesi Facebookta paylaşqan «ekstremist» yazısı içün 5 kün nezaret altında bulunğan qırımlı advokat Emil Kurbedinovnıñ davasınen bağlı itiraz arizalarını baqmaqta.
«Qırım birdemligi» cemaat birleşmesiniñ bildirgenine köre, Kurbedinovnıñ menfaatlarını advokatlar Lilâ Gemeci ve Aleksey Ladin temsil ete.
İmaye tarafı halqara uquq ve Rusiye qanunlarına esaslanıp, mahkeme oturışuvında Rusiye prokurorınıñ bulunması aqqında muracaatta bulundı. Qadı qanaatlendirmege istemey.
İmaye tarafı mahkeme salonına qabaat şaatlarınıñ celp etilmesini de istey. Kurbedinovnıñ advokatları FSB hadimi Andrey Suşkonıñ kelmesini de talap ete.
Dekabrniñ 11-nde Kurbedinov vaqtınca tutuv izolâtorından çıqtı. Onı 2013 senesi Facebookta paylaşqanları içün ekstremist teşkilâtlarnıñ işaretleri ya da timsalleriniñ teşviqatı ve açıq numayış etilmesi sebebinden apiske aldılar. Kurbedinovnıñ zenaatdaşları dey ki, onı Dimaşqqa köçken Qırım sakini şikâyet etti.
Advokatnıñ fikirince, onıñ dekabrniñ 6-nda Rusiye uquq qoruyıcıları tarafından tutulması «olmaycaq sebeplerden» yapıldı, o, ekstremizm qabaatlarını tanımay. Emil Kurbedinov qayd etkenine köre, tutulmasınıñ kerçek sebebi onıñ aq qorçalayıcı faaliyeti, siyasiy mabüslerge köstergen yardımı ve Ukraina askeri Bogdan Nebılitsanı qorçalağanı ola.
Emil Kürbedinovnıñ davasında şaatlardan biri Rusiye FSB hadimi Andrey Suşko ola. O, qırımtatar faali Renat Paralamovnıñ hırsızlanması ve azaplanmasında iştirak etken edi.
Keçenleri Suşko Paralamovnı hırsızlağanında şeklenip, ABD sanktsiyalar cedveline kirsetilgen edi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
