Apiske alınğan Aqmescitteki «Hizb ut-Tahrir davasınıñ» mabüsi Ayder Saledinov Rostov-na-Donu SİZOsınıñ kartserine qapatıldı. Bu aqta «Qırım birdemligi» cemaat birleşmesi Saledinovnıñ apayı Guzalnıñ malümatına esaslanıp bildire.
2019 senesi aprelniñ 3-nde Ayder ömür arqadaşınen qısqa körüşip, belinde ve areket etkende ağrı olğanını, buğumnıñ yeri deñişkenini bildirdi. Saledinov SİZOnıñ tibbiy hadimlerine tibbiy yardım içün muracaat etti, amma tibbiy yardım yerine kartserge qapatıldı. Advokat Lilâ Gemeci Saledinovnıñ apayına aqayı bir kişilik kamerağa avuştırılğanını bildi.
Berilgen malümatqa köre, Saledinov üç kün devamında kartserde qaldı, bundan soñ onı mahsus blokqa qaytardılar. Apiske alınğannıñ ömür arqadaşı bildirgenine köre, o, SİZO ekimi ve hadimlerini şikâyet etti.
2016 senesi oktâbrniñ 12-sinde Qırımda beş musulman qorantasınıñ evleri tintildi. Tintüvler neticesinde Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzeir Abdullayev, Teymur Abdullayev, Emil Cemadenov ve Ayder Saledinov tevqif etilgen edi.
Keçken sene dekabrniñ 6-nda belli oldı ki, «Hizb ut-Tahrir davasınıñ» Aqmescit taqımınıñ mabüsleri Teymur ve Üzeir Abdullayevler, Ayder Saledinov, Rustem İsmailov ve Emil Cemadenovnı Rostov-na-Donu Rusiye şeeriniñ SİZOsına etap ettiler.
Bu sene fevralniñ 19-nda Şimaliy-Kavkaz okrugınıñ arbiy mahkemesinde Aqmescitteki «Hizb ut-Tahrir davasınıñ» gizli şaatı sorğuğa çekildi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
Bu sene mart ayında Ayder Saledinov Rostov-na-Donu SİZOsınıñ mahsus blokuna qapatıldı.
