Aqmescitteki «Hizb ut-Tahrir davasınıñ» mabüsi Asan Yanikov eki aydan berli «antisanitar şaraitli» kamerada karantinde buluna. Bu aqta advokat Safiye Şabanova «Qırım birdemligine» bildirdi.
«Asan Yanikov 2020 senesi avgustnıñ 8-nden berli karantinde buluna, dep ayttı, anda eki aftadan çoq tutmaylar. Bu mağaz odası, tranzittir. Bu kameradan yañı kelgenler kameralarğa kete. Kameranıñ şaraitleri sanitar degildir, dımlı», – dep aytıla imayeciniñ haberinde.
Şabanovanıñ aytqanına köre, Yanikovnıñ sağlıq vaziyeti fenalaştı, amma tibbiy yardım kösterilmey.
«Aşqazan-içekler problemleri yañıdan başladı. Asan azdı, arıqladı. Asanğa tibbiy yardım kösterilmey. Aqmescitniñ SİZO-1-nde ilâc yoq. Müvekkilimniñ aytqanına köre, bütün hastalıqlardan tsitramonnen tedaviyleyler», – dedi Şabanova.
Rusiyeniñ Cezalarnı yerine ketirüv federal hızmetiniñ hadimleri Yanikovnı tutuv şaraitleri aqqında malümat bermey.
Yanikov 2019 senesi martnıñ 27-nde tutuldı. O künü Rusiye quvetçileri qırımtatarlarnıñ evlerini tintken edi.
«Memorial» aq qorçalayıcı merkezi Aqmescitteki ekinci «Hizb ut-Tahrir davasınıñ» mabüslerini siyasiy mabüs dep tanıdı ve olarnı acele azat etmege talap etti.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
