Aqmescitteki «Hizb ut-Tahrir davasınıñ» mabüsi Teymur Abdullayevniñ ceza izolâtorında qaluv müddeti 15 künge uzatıldı. Bu aqta mabüsniñ ömür arqadaşı ve anası «Qırım birdemligine» bildirgenler.
Berilgen malümatqa köre, «Hizb ut-Tahrir davası» boyunca 16 yıl ve 6 ayğa üküm etilgen Abdullayev «Zona-Telekom» apishane bağı vastasınen Rusiyeniñ Başkortostan koloniyasından tuvğanlarına telefon etti.
Apayı Alime Abdullayeva ve anası Dilâra Abdullayevağa aytqanına köre, onı daa 15 künge ceza izolâtorında qaldıracaqlar, çünki nizam cezası biteyata.
Alime Abdullayevanıñ tarif etkenine köre, o, qan basımından özüni yaramay is ete, amma ilâc içe, anası yollağan tonometrni qullana ve tüzele. Dekabr ayında keçirgen COVID-19 aqibetlerini de is ete.
Abdullayevniñ anası aytqanına köre, koloniya memuriyetiniñ büyük basqısına baqmadan, oğlu eminligini coymay.
«Anam, qasevetlenme, imanım küç bere, iman ise dünyadaki er şeyden küçlüdir, Allahqa olğan işançı onı qoruy. İnsannıñ özüne kelüv yedekleri bar. Bunıñ esası – teñ kelmesi kerek olğan fikir, laf ve areketleri. Allah menim tarafımda olsa, kimler qarşı çıqa bile? – dep aytqan maña», – dep ayta onıñ sözlerini qadın.
Martnıñ soñunda Abdullayevniñ ceza izolâtorında qaluv müddeti «iç nizamnı bozğanı içün» daa 15 künge uzatıldı.
Martnıñ 4-nde belli olğanına köre, Abdullayev 15 künge ceza izolâtorında qaldırıldı.
Martnıñ 16-nda Ukraina Baş prokurorınıñ ofisi, Abdullayevniñ ceza izolâtorında tutulması sebebinden istilâcı memlekette akimiyet organlarınıñ vekilleri tarafından qanun ve cenk ananelerini bozuv boyunca (Ukraina Ceza kodeksiniñ 438-inci maddesiniñ 1-inci qısmı) cinaiy tahqiqat başlattı. Teymur Abdullayevniñ anası Dilâra Abdullayeva bildirgenine köre, gipertonik kriz qayd etile, ceza izolâtorında oña yatmağa aytqanlar.
Ukraina Yuqarı Radasınıñ insan aqları vekâletlisi Lüdmila Denisova Rusiye insan aqları vekâletlisi Tatyana Moskalkovağa muracaat etip, Rusiye koloniyasında tutulğan Aqmescitteki «Hizb ut-Tahrir davasınıñ» mabüsi Teymur Abdullayevniñ «aqlarını ğayrıdan tiklenmesini temin etmege» talap etti.
Rostov-na-Donunıñ Cenübiy okrugınıñ arbiy mahkemesi bu davanıñ mabüslerine 2019 senesi iyün ayında üküm çıqardı. Daa soñra Rusiye Yuqarı mahkemesi qırımlılarnıñ ükmüni deñiştirdi.
Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
2019 senesi iyün ayında Rostov-na-Donunıñ Cenübiy okrugınıñ arbiy mahkemesi bu dava mabüsleri Teymur Abdullayevni 17 yılğa, Uzeir Abdullayevni 13 yılğa, Rustem İsmailovnı 14 yılğa, Ayder Saledinov ve Emil Cemadenovnı 12 yılğa üküm etti.
Ukraina Tış işler nazirligi bu davağa qarşı narazılıq bildirip, Rusiyege qarşı sanktsiyalarnı quvetleştirmege çağırğan edi.
«Memorial» aq qorçalayıcı merkezi bu davanıñ bütün mabüslerini siyasiy mabüs dep tanıdı.
