Aqmescitteki ekinci «Hizb ut-Tahrir davasınıñ» mabüsi Eskender Suleymanov verem hastası ile bir kamerada tutuldı. O, tibbiy-sanitar bölükke ariza berdi ve flüorografiya yapıldı, amma tedqiq neticelerini alıp olamay. Bu aqta Suleymanov advokatı Rustem Kâmilevge bildirdi, dep haber ete «Qırım birdemligi».
«Onı daa bir kere teşkersinler dep, tahqiqat izolâtorınıñ reberine bir qaç kere muracaat etken edik. Bir afta evelsi teşkerüv oldı. Eskenderge tekrar flüorografiya yapıldı, amma neticelerini aytmaylar. Neticelerniñ gizli qalması şübhelendire», – dep tarif etti advokat Kâmilev.
İmayeci bildirgenine köre, qırımlı bulunğan kamera pek suvuq, SİZOda berilgen yorğan ise o qadar yırtıldı ki, üstüni örtmege çare yoq. Soy-soplarınıñ qızdırğıç yollamaq ıntıluvları red etile.
Kâmilevniñ aytqanına köre, Eskender Suleymanov mahkeme belgilegen müddet devamında cinaiy dava malümatlarını ögrenip yetiştirmedi – o, 57 cılttan tek 38-ini baqtı. Bundan ğayrı, imayege davanıñ 56-ncı ve 57-nci cıltı aqqında haber etilmedi.
2019 senesi iyünniñ 10-nda Aluşta, Qarasuvbazar ve Aqmescit rayonlarında keçirilgen tintüvlerden soñ 8 kişi tutuldı: Ruslan Nagayev, Eldar Kantimirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye FSBsi, tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) açılğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı, dep bildirdi.
Ukraina uquq qoruyıcı organları Rusiye quvetçileriniñ Qırımda keçirgen tintüvleri sebebinden cinaiy tahqiqat başlattı.
Ukraina Tış işler nazirligi, Qırımdaki apiske aluvlarğa qarşı narazılıq bildirip, Rusiyege qarşı siyasiy, iqtisadiy ve sanktsiyalar basqısını quvetleştirmege çağırdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
