Aqmescitte cuma künü noyabrniñ 21-nde olğan furtuna aqibetlerini yoq eteler. Rusiye kontrolindeki Aqmescit memuriyetiniñ matbuat hızmeti bildirgenine köre, küçlü ruzgâr vaqtında terekler sındı ve zarar kördi. Şeerniñ soqaqları ve yolları terekler tübünde qaldı.
«Aqmescitniñ yekâne nevbet-dispetçer hızmetine 9 vatandaş muracaat etti. Ev damları, maşina, yollarğa büyük pıtaqlar ve atta terekler tügti, teller qoparıldı. Tünevin «Şeer» taqımı 5 qazaiy vaziyetni al etti, işler bugün de devam ete», – dep aytıla memuriyetniñ haberinde.
Zarar körgen tereklerniñ ekseriyeti – «kesilecek ve yolcu ve maşinalar içün telükeli olğan qazaiy terekler edi».
Tünevin qırımlı qurtarıcılar yarımadada ava bozulacaq, dep tenbiledi. Noyabrniñ 22-nde gece küçlü yel Canköyniñ №7 mektebinde damnı qoparıp aldı. Dam 840 metr kârelik edi, kimse zarar körmedi, dep bildirdi yarımadanıñ acele hızmetleri.
Noyabrniñ 22-nde saba «Krımenergo» elektrik ağlarını bozğan yel aqqında bildirdi. Yarımadanıñ 80-den çoq mesken yeri zarar kördi.
Qırım Fevqulâde vaziyetler nazirligi furtuna quvetleşkeni içün balıqçılarnı açıq deñizge çıqmaq telükeli olacaq, dep tenbiledi.
