Aqmescitteki ekinci «Hizb ut-Tahrir davasınıñ» mabüsi Rustem Seythalilov yanvarniñ 18-nde doğğan kününi SİZOda qayd ete. «Qırımtatar resurs merkeziniñ» malümatına köre, Seythalilov 36 yaşını toldurdı.
«Doğğan kününi Qırımnıñ işğalci akimiyeti qapatqan apiste qayd etmege mecbur. Qırımtatar Resurs Merkeziniñ hadimleri Rustem Seythalilovnı doğğan kününen tebrikley! Tezce azat etilmesini ve qorantası ve tuvğanlarına qavuşmasını, qaviy sağlıq, sabır, bükülmez irade ve amanlıq tileymiz», – dep aytıla haberde.
Rusiye kontrolindeki Aqmescitniñ Kiyev rayon mahkemesi noyabrniñ 11-nde Aqmescitteki ekinci «Hizb ut-Tahrir davası» sekiz mabüsiniñ apis müddetini üç ayğa uzattı. Rustem Şeyhaliyev, Tofik Abdulgaziyev, Raim Ayvazov, Bilâl Adilov, Cemil Gafarov, Farhod Bazarov, Rustem Seythalilov ve Şaban Umerov 2020 senesi fevralniñ 15-ne qadar SİZOda qalacaqlar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
