Aqmescitteki ekinci «Hizb ut-Tahrir davasınıñ» mabüsleri Farhod Bazarov ve Rustem Seythalilovnıñ apis müddetini uzattı. Qırım.Aqiqat mühbiriniñ bildirgenine köre, Rusiye kontrolindeki Aqmescit Kiyev rayon mahkemesiniñ qadısı Galina Hulapova fevralniñ 10-nda olğan oturışuvda qırımlılarnı martnıñ 15-ne qadar apiste qaldırmağa qarar aldı.
Bugün Aqmescitte mezkür dava mabüsleriniñ sıñırlav müddetini uzatacaq dört mahkeme oturışuvı keçirile.
Rusiye kontrolindeki Aqmescitniñ Kiyev rayon mahkemesi 2019 senesi noyabrniñ 11-nde Aqmescitteki ekinci «Hizb ut-Tahrir davası» sekiz mabüsiniñ apis müddetini üç ayğa uzattı. Rustem Şeyhaliyev, Tofik Abdulgaziyev, Raim Ayvazov, Bilâl Adilov, Cemil Gafarov, Farhod Bazarov, Rustem Seythalilov ve Şaban Umerov 2020 senesi fevralniñ 15-ne qadar SİZOda qalacaqlar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
