Aqmescitniñ bala bağçalarında nevbet bu sene 18 biñ insandan ziyade oldı, dep bildire şeerniñ Rusiye memuriyetiniñ matbuat hızmeti Aqmescit memuriyeti yolbaşçısınıñ muavini Tatyana Suhinanıñ malümatına esaslanıp.
Berilgen malümatqa köre, Kefe, Kezlev, Yalta ve Aluştada da vaziyet qıyın, çünki bala bağçalarında yer yetmey.
«Belli sebeplerden Aqmescit bala bağçaları küzde tek beş balanı qabul etip olur. Bala bağçalarına nevbetsiz keçmek aqqı tek çoq balalı qorantalardan bala, saqat balalar, Çornobıl qazasında zarar körgen ana-babalarnıñ balaları, tahqiqat organları, Fevqulâde vaziyetler nazirliginiñ hadimleriniñ ve arbiylerniñ balalarında bar. Ve 2019 senesi sentâbrniñ 1-ne qadar qalğan boş yerler sayılsa, umumen beş biñ insannı qabul etecekmiz», – dep ayttı Tatyana Suhina.
Memurnıñ aytqanına köre, Aqmescitte 56 bala bağçası ve mektep içinde 8 bölük çalışa.
Aqyardaki Rusiye Tahqiqat komitetiniñ idaresi bala bağçasında balalarnıñ himik madde ile zeerlenüvi sebebinden cinaiy iş açqan edi.
2017 senesi noyabr ayında Rusiye tayin etken Qırım yolbaşçısı Sergey Aksenov Rusiye prezidenti Vladimir Putinden bala bağçalarınıñ qurucılığına 2,5 milliard ruble isteycek, dep bildirgen edi.
2018 senesi sentâbr ayında Aluştadaki Rusiye Tahqiqat komitetiniñ idaresi mahkemege qullanılmaycaq bala bağçasını qurğan qurucılıq şirketiniñ tesisçileri ve reberlerine qarşı dava açtırdı.
