Aqmescitte yaramay ava neticesinde tüşken terekler Gogol soqağındaki ev sakinlerine çıqmağa imkân bermedi, dep bildire Qırımnıñ Rusiye Fevqulâde vaziyetler nazirliginiñ matbuat hızmeti.
«Kelgen soñ añlaşıldı ki, yaramay ava neticesinde eski terek tüşti. Üç şahsiy evniñ sakinleri blok etildi. Bundan ğayrı, terek tüşkeni içün gaz ve elektrik hatları zarar kördi, hızmetlerniñ mütehassısları olarnı kesti», – dep aytıla haberde.
Aqmescitniñ Rusiye memuriyeti bildirgenine köre, şeerniñ bir sıra adresinden furtunalı ava aqibetlerini yoq etüv muracaatları kele.
«9 vatandaşnıñ yaramay ava aqibetlerinen bağlı muracaatları qayd etildi. Balaban pıtaq ve terekler maşinalarğa, yollarğa tüşti ve tellerni bozdı. Böyle muracaatlar Mate Zalki, Gogol, Gertsen, Gaydar, Çernomorskaya, Semaşko, Gasprinskiy, Kamskaya soqaqlarından ve GRES durağından keldi. Bundan ğayrı, Karaimskaya ve Krılov soqaqlarınıñ çaprazında ışıqlar tüşti», – dep aytıla memuriyetniñ haberinde.
Qırımnıñ Fevqulâde vaziyetler nazirligi sentâbrniñ 2-nde Aqmescitte bazı yerlerde pek küçlü yağmurlar, boranlı yağmur, burçaq yağacaq, yel saniyede 20-25 metr süratınen esecek, dep tenbilegen edi.
