Aqmescit tükânlarında zencefil fiyatı tüşti, sarımsaq fiyatı ise 15-20% arttı, dep bildire Qırım.Aqiqat mühbiri.
«Aşan» gipermarketinde zencefil tamırınıñ kilosı 2787 rubleden (1 biñ ğrıvnâdan paalı) satıla, «Yabloko» ağ tükânında – bir kilosı 1999 ruble (726 ğrıvnâ). Sebze ve meyva satış noqtalarında zencefil kilosı 900-1200 rubleden (327-436 ğrıvnâ) saytıla. Onıñ fiyatı bir kilo içün 5000 rublege qadar (1800 ğrıvnâ) artqan edi.
Tükânlarda sarımsaq fiyatınıñ artuvı qayd etildi. Onı 300-500 rubleden (100 ğrıvnâdan çoq) satqan olsalar, şimdi bir kilosını 400-500 rubleden (145-181 ğrıvnâ) satalar.
Limon fiyatı bir kilo içün 450-500 rubleden (163-181 ğrıvnâ) 350-400 (100-145) rublege tüşti.
Rusiye kontrolindeki Qırım köy hocalığı naziri Andrey Rumşinniñ bildirgenine köre, «borşç mahsulatı» fiyatları artmağa devam ete.
Koronavirus tarqalğanına dair malümat peyda olğan soñ, Qırımda zencefil pek paalılaşqan edi, daa soñra Aqmescitte satışta iç qalmadı. Qırımnıñ Rusiye akimiyeti bildirgenine köre, bir qaç kün içinde onıñ fiyatı 20 qat arttı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
